DWIZ 882

Hangad ng pamahalaan na gawing opsyon na lamang ang pagtatrabaho sa ibang bansa, sa halip na isang necessity o pangangailangan.

Sa 2024 Presidential Awards for Filipino Individuals and Organizations Overseas na ginanap sa Malakanyang, binigyang diin ni Pangulong Ferdinand Marcos Jr., na patuloy na isinusulong ng kanyang liderato ang mga reporma sa pamamahala at pag-unlad ng ekonomiya upang makapagbigay ng mas maraming oportunidad.

Sa kabila nito, kinikilala naman ng pangulo ang globalisasyon.

Kaugnay nito, tiniyak ni PBBM na mananatiling handa ang pamahalaan na pangalagaan ang karapatan at kapakanan ng mga OFW at kanilang pamilya, sa pamamagitan ng mga programa tulad ng One Repatriation Command Center at Agarang Kalinga at Saklolo Fund.

Inihain ng mga lider ng Kamara de Representantes noong miyerkules ang House Bill no.11192 na naglalayong i-regulate ang paglalaan at paggamit ng Confidential at Intelligence Funds (CIFs) at patawan ng parusa ang maling paggamit nito.

Naghain din sila ng kaugnay na panukala upang i-regulate ang mga Special Disbursing Officer (SDO) ng gobyerno at magtakda ng parusa sa maling paggamit ng pondong kanilang pinangangasiwaan.

Ang dalawang panukala ay inakda ng 38 miyembro ng Committee on Good Government and Public Accountability na pinamumunuan ni Manila Rep. Joel Chua, kasama sina Senior Deputy Speaker at Pampanga 3rd District Rep. Aurelio Gonzales Jr., Deputy Speaker at Quezon Rep. David Suarez, at Manila Rep. Bienvenido Abante Jr., Vice Chairman ng komite.

Ang mga panukalang batas ay bunga ng masusing imbestigasyon ng komite sa umano’y maling paggamit ng P612.5 milyon na confidential funds na natanggap ng Office of the Vice President Sara Duterte at ng Department of Education sa ilalim ng kaniyang pamumuno.

Inaprubahan ng Bicameral Conference Committee Budget ang desisyon ng Kamara de Representantes na pondohan ang Ayuda sa Kapos ang Kita Program.

Binigyang-diin ni House Speaker Martin Romualdez, na mahalaga ang nasabing programa para sa mga pilipinong may trabaho ngunit hindi sapat ang kita.

Ayon kay House Committee on Appropriations Chairman at Ako Bicol Party-List rep. Zaldy Co, ang AKAP ay pinaglaanan ng kabuuang 26 bilyong pisong pondo sa ilalim ng panukalang pambansang badyet para sa 2025.

Dahil dito, nagpasalamat si Speaker Romualdez sa mga senador sa kanilang suporta sa akap at pinuri ang House Committee on Appropriations na pinamumunuan ni Ako Bicol Party-List rep. Zaldy Co, para sa matagumpay na pagtatanggol ng mga panukalang badyet.

Tuluy-tuloy pa rin sa pagkilos ang pamahalaang Lungsod ng Canlaon City dahil sa patuloy na pag-aalburoto ng bulkang Kanlaon.

Sa panayam ng DWIZ, binigyan-diin ni Canlaon City Mayor Jose Cardenas na patuloy nilang pinaghahandaan ang worst case scenario.

Kaugnay nito, nangangamba naman ang Alkalde na posibleng hindi na kayanin pa ng kanilang pamahalaan kung magtatagal pa ang mga volcanic activities, dahil anya nasa survival mode na ang kanilang lungsod. - Sa panulat ni Kat Gonzales

Nilinaw ng Metropolitan Manila Development Authority na wala silang patakaran na nagbabawal sa mall-wide sales.

Sa pagdinig ng Senate Committee on Public Services, sinabi ni MMDA Director 3 for Enforcement Atty. Victor Nuñez, na nakiusap lamang sila na huwag gawing sabay-sabay ang sale ng lahat ng retailers o merchants sa mga mall; at abisuhan sila kaugnay dito para mapag-planuhan ang traffic flow at deployment ng Traffic Enforcers.

Kaugnay nito, hiniling naman ni Sen. Raffy tulfo, Chairman ng Komite, sa mall operators na huwag magsabay-sabay ng sale ang kanilang mga branch para hindi magkabuhol-buhol ang traffic sa Metro Manila.

Ibinasura ng Sandiganbayan ang dalawang civil case laban kay dating pangulong Ferdinand Marcos Sr., dating first lady Imelda Marcos, dating presidential legal counsel Juan Ponce Enrile, at iba pa kaugnay sa sinasabing pagnanakaw sa kaban ng bayan.

Ayon sa resolusyon na inilabas ng anti-graft court, ibinasura ang mga kaso matapos iurong ng pamahalaan ang mga demanda kaugnay sa sinasabing maanumlyang paggamit sa coco levy fund.

Nauna na ring nagpasya ang presidential Commission on Good Government na hindi na nito itutuloy ang paghahabol sa danyos na kanilang hinihiling sa mga inihaing reklamo.

Mababatid na nagsampa ng reklamo ang PCGG noong July 31, 1987 upang mabawi ang mga yaman ng defendant.  – Sa panulat ni John Riz Calata

Walang problema na ibalik ang budget ng kontrobersyal na Ayuda sa Kapos ang Kita o AKAP Program ng Department of Social Welfare and Development.

Giit ni Senator Imee Marcos na ito’y kung magiging klaro ang mga panuntunan at kung sinu-sino ang mga benepisyaryo ng programa na dati nang nadawit sa pekeng People’s Initiative para sa charter change.

Ayon kay Super Ate, hindi naman siya tutol sa AKAP kundi nais lamang niyang magarantiya na makararating ang bilyones nitong pondo sa mga tunay na nangangailangan.

Nilinaw din ng Senador na hindi niya ni-re-align sa ibang programa ang inalis niyang 39-na bilyong pisong proposed budget ng AKAP sa ilalim ng Senate version ng 2025 national budget.

Matatandaang inirekumenda ni Senator Marcos na siyang sponsor ng DSWD budget na pag-isahin na lamang ang AKAP at ang Assistance to Individuals in Crisis situation ng DSWD dahil parehas lang naman aniya ang tinutulungan nitong sektor.

Naging kontrobersyal ang Akap nang sabihin ng presidential sister na ginamit ito ng ilang kongresista upang lituhin aniya ang mga pilipino at himukin ang mga itong sumuporta sa People’s Initiative.

Walang sapat na ebidensya upang maiugnay si dating pangulong Rodrigo Duterte sa iligal na operasyon ng mga POGO sa bansa.

Ito ayon sa Justice Undersecretary Nicholas Felix Ty, ay matapos ang kanilang magsagawa ng imbestigasyon sa kada pogo sa bansa.

 Sinabi pa ni Usec. Felix Ty, wala silang nakitang nagkokonekta sa dating pangulo sa antas ng pang-indibidwal na pogo.

 Salungat ito sa inilabas na POGO matrix ni Senador Risa Hontiveros kung saan iniugnay nito si dating pangulong Duterte kay Michael Yang, dating presidential adviser ni FPRRD, na sangkot sa operasyon ng mga iligal na POGO sa bansa.  - Sa panulat ni John Riz Calata

Naniniwala ang isang miyembro ng Kamara na ‘peke’ o gawa-gawa lamang ang sinabi ni Vice President Sara Duterte na mayroong nais pumatay sa kanya, gaya ng mga karakter na sina “Mary Grace Piattos” At “Kokoy Villamin,” na ginamit sa pagtanggap ng confidential fund ng Pangalawang Pangulo.

Tinawag ni Assistant Majority Leader at Tingog Partylist Rep. Jude Acidre na “peke” ang mga alegasyon ni Duterte ukol sa banta ng pagpatay at patunay dito ang hindi nila pagre-report nito sa Armed Forces of the Philippines at Philippine National Police.

Kung mayroon anyang mga banta, tanging si VP Sara ang narinig nilang gumawa nito partikular ang kontrobersyal na pahayag na umano’y kumuha ito ng “hit-man” upang ipapatay sina Pangulong Ferdinand Marcos Jr., First Lady Liza Araneta-Marcos at House Speaker Martin Romualdez kung sakaling may mangyari sa kanya.

Nagsimula na rin ang National Bureau of Investigation ng kanilang imbestigasyon sa mga naging pahayag ng Bise Presidente.

Inihalintulad ni Acidre ang mga banta ni Duterte sa mga pekeng identity nina “Mary Grace Piattos” at “Kokoy Villamin,” na mga pangalan sa  acknowledgment receipts na isinumite ng Office of the Vice President at Department of Education sa Commission on Audit bilang patunay ng paggastos sa kabuuang 612.5 million peso confidential fund.