DWIZ 882

Tiwala ang Malakaniyang na good choice si Police Lt/Gen. Archie Francisco Gamboa para pamunuan ang hanay ng pambansang pulisya.

Ito ang inihayag ni Presidential Communications Sec. Martin Andanar makaraang italaga ni Pangulong Rodrigo Duterte si Gamboa na pamunuan ang PNP kapalit ng nagretiro nang si P/Gen. Oscar Albayalde.

Ayon kay Andanar, naniniwala siya sa ipinakitang sinseridad ni Gamboa na linisin ang hanay ng pulisya mula sa mga scalawags at pursigido itong itayong muli ang imahe ng PNP sa publiko.

Magugunitang nabahiran ang pangalan ng PNP matapos masangkot sa isyu ng mga ninja cops si Albayalde dahil sa maanomalyang operasyon ng mga dati nitong tauhan sa Pampanga nuong 2013.

Of course kung sino po ang pinili ni Presidente, sa Phil. National Police as PNP Chief ay siya po ang karapat-dapat na maglingkod. To serve and protect, para malinis at linisin po ang imahe ng PNP—ani Sec. Andanar sa panayam ng Oh IZ sa DWIZ.

Dumalo sa kauna-unahang pagkakataon mula nang maupo sa puwesto si Pangulong Rodrigo Duterte sa taunang Sinulog festival sa Cebu kasabay ng pista ng senyor Sto. Niño.

Personal na sinaksihan ng Pangulo ang Sinulog ritual showdown sa Cebu City Sports Complex at inaasahan siyang magbibigay ng talumpati.

Kasama ang mga opisyal ng pamahalaan ng Cebu at 15,000 manonood, panonoorin din ng Pangulo ang pagtatanghal ng Sinulog dancing contingents.

Matapos nito, pangungunahan din ng Pangulo ang unveiling ng marker sa Terminal 1 ng Mactan-Cebu International Airport sa Lapu-Lapu City.

Kasama ng Pangulo sina Cabinet Secretary Karlo Alexi Nograles, Senador Christopher Lawrence Bong Go at Presidential Communications Office Sec. Martin Andanar.

Nagpadala ng aabot sa 40 bote ng tig-100ml na pasteurized human milk ang Quezon City human milk bank sa mga nagpapasusong nanay sa evacuation centers.

Ayon kay Dr. Josephine Sabando, Direktor ng Quezon City General Hospital, layon nitong tiyakin na may sapat na nutrisyon ang mga sanggol na inilikas bunsod ng pag-aalburuto ng bulkang Taal.

Kasunod nito, nagsagawa ng milk letting acitivities sa mga komunidad upang maka-ipon ng gatas ng ina kung saan, may 200 bote pa ng human milk ang handang ipamahagi sakaling kailanganin.

Una rito, nagpadala na rin ang Quezon City Local Government unit ng mga kumot, kutson, tents at mobile showers para sa mga nagsilikas na residente ng Cavite at Batangas.

Nadagdagan pa lalo ang halaga ng mga napinsalang produkto bunsod ng patuloy na pag-aalburuto ng bulkang Taal.

Batay sa datos ng Department of Agriculture, aabot na sa kabuuang P3.17B ang naitala nilang pinsala sa sektor ng agrikultura.

Aabot naman sa mahigit 15,700 ektarya ng taniman ang apektado ng abong ibinuga ng bulkan partikular na sa Batangas, Cavite at Laguna.

Kaugnay nito, naglaan na rin ng isang mobile clinic at gamot para sa mga naapektuhang hayop ang Phil. Carabao Center.

Bukod pa ito sa 2 1/2 toneladang mga pakain para sa baka, kalabaw, tupa at kambing gayundin ang isang toneladang mais at 1 1/2 toneladang tangkay ng palay.

Pansamantalang itinigil ng Department of Public Works and Highways (DPWH) ang kanilang clearing operations mula sa bahagi ng Tagaytay City sa Cavite hanggang sa bahagi ng Batangas.

Ito’y makaraang isara ang limang kalye sa paligid ng bulkang Taal bunsod ng ipinatupad na lockdown ng mga awtoridad na layong iligtas ang mga mamamayan duon mula sa peligrong dulot ng pag-aalburuto ng bulkan.

Kabilang sa mga isinarang kalsada ang Tanauan-Talisay-Tagaytay road; Talisay-Tagaytay section sa Talisay; Talisay-Laurel -Agoncillo road partikular na ang Talisay section at Agoncillo section sa Barangay Banyaga sa Agoncillo gayundin ang Lake Taal-Tagaytay road na pawang matatagpuan naman sa lalawigan ng Batangas.

Itinigil din ang clearing operations sa bahagi naman ng Tagaytay-Taal Lake road at Tagaytay-Talisay road na kapwa sakop naman ng Tagaytay City dahil pa rin sa lockdown.

Kasunod nito, inilagay muna sa standby mode ang mga tauhan at sasakyan ng DPWH at maghihintay ang mga ito ng abiso kung kailan sila muling magsisimula ng kanilang clearing at rescue – relief operations

Isinusulong ni Senate Pro-tempore Ralph Recto ang pagbuo ng isang komisyon o task force na tututok at titiyak sa pagpapatupad ng rehabilitasyon sa mga lugar at biktimang naapektuhan ng pag-aalburuto ng bulkang Taal.

Ayon kay Recto, ihahain niya at ng kanyang asawa na si Congresswoman Vilma Santos ang panukalang pagtatatag ng Taal Commission.

Sinabi ni Recto, itutulad niya ito sa Pinatubo Commission na naging malaking tulong para sa muling pagbangon ng mga biktima ng pagputok ng Mt. Pinatubo noong 1991.

Sa kabila nito, binigyang diin ni Recto na hindi nagkukulang ang national government sa pagbibigay ng ayuda sa mga biktima ng pag-aalburuto ng Taal volcano.

Aniya, nagpapasalamat siya kay Pangulong Rodrigo Duterte na binibigyan nito ang importansiya ang mga taga-Batangas.

Mayroon na tayong karanasan tungkol dyan, yong Pinatubo. Nagtayo tayo ng Pinatubo Commission nuong 1992. After Pinatubo nagkaroon ng funding para sa rehabilitation. Yon din ang pinag-aaralan ko ngayon, para yon ang gagawin natin. We will file a bill, probably creating a Taal Commission nang sa ganon ay matulungan natin ang mga kababayan natin hindi lamang sa Batangas kasama na siguro ang Cavite, mga naapektuhan din sa Cavite para magkaroon ng rehabilitation at recovery fund sa mga darating na taon dahil mahaba ang recovery at rehabilitation.—ani Recto sa panayam ng Usapang Senado.

Nagustuhan ni Pangulong Rodrigo Duterte ang pagiging tapat ni Philippine National Police (PNP) Chief Lt. General Archie Francisco Gamboa.

Ito ang inihayag ni Presidential Spokesperson Salvador Panelo na naging isang batayan ng pangulo sa pagtatalaga kay Gamboa bilang hepe ng PNP.

Ayon kay Panelo, katapatan at kakayahan sa trabaho ang dalawang pangunahing katangiang kabilang sa criteria ni Pangulong Duterte sa paghahanap ng bagong PNP Chief.

Gayunman, mas nangibabaw aniya ang katapatan dahil inaasahan na ang pagiging competent ng mga kabilang sa short list dahil bahagi ito ng kanilang trabaho.

Biyernes ng iaanunsyo ni Pangulong Duterte ang ganap na pagkakatalaga kay Gamboa bilang PNP Chief matapos tumayong Officer in Charge sa loob ng mahigit 3 buwan.