Ipinagkibit-balikat ni Vice President Leni Robredo ang akusasyon ni Presidential Communications Undersecretary Lorraine Badoy na siya ang nagpapakalat ng mga maling impormasyon o fake news.
Ayon kay Robredo, hindi niya pag-aaksayahan ng panahon si Badoy dahil maraming mas mahalagang issue na dapat pagtuunan.
Sa pagdinig ng Senado sa fake news, itinuro ng palace official ang pangalawang Pangulo bilang pangunahing tagapag-pakalat ng mga maling impormasyon.
Gayunman, mismong si Badoy ay inaakusahang nagpapakalat ng fake news dahil sa Facebook post nito noong 2016 elections hinggil sa kalaguyo umano ni Senador Manny Pacquiao.
Samantala, humingi na ng despensa si Badoy kay Pacquiao kaugnay sa issue at inaming pawang mga guwardya at tindero sa kalsada ang kanyang source.
