Walong high profile inmate umano sa New Bilibid Prisons (NBP) sa Muntinlupa City ang nasawi na matapos tamaan ng coronavirus disease 2019 (COVID-19).
Ito ang pagbubunyag ni Senate President Vicente Tito Sotto III batay sa impormasyong ipinarating sa kaniya ng isang mapagkakatiwalaang source.
Nakasaad sa impormasyon na pawang kabilang sa tinaguriang ‘Bilibid 19’ o mga big time drug lords ang mga nasawi mula pa nuong Mayo dahil sa virus.
Kabilang sa mga lumutang na pangalan ay sina Francis Go, Jimmy Yang, Benjamin Marcelo, Zhang Zhu Li, Jimmy Kinsing Hung, Eugene Chua, Ryan Ong, at Amin Buratong.
Nakasaad din sa impormasyong nakuha ni Sotto na ang Eastern Funeral Homes sa Alabang ang siyang nag-asikaso sa labi ng mga nabanggit na preso subalit wala naman itong record.
Sinasabi pa sa ulat na na-cremate na umano sina Go, Yang, at Zhang sa Panchong de Dasmariñas sa Cavite habang sa Manila North Cemetery naman si Eugene Chua.
Gayunman, wala nang ibang impormasyon kung saan naman na-cremate ang iba pang mga high profile inmate na sinasabing nasawi sa loob ng NBP.
