Aarangkada na ang implementasyon ng 70 percent capacity sa mga pampublikong transportasyon sa Metro Manila simula November 4 makaraang palawigin ang alert level 3 sa rehiyon.
Inanunsyo ito ng DOTr at LTFRB Matapos aprubahan ng IATF ang kanilang hirit na taasan kapasidad upang matulungan ang mga operator at driver na mabawi ang kanilang kita sa gitna ng patuloy na oil price hike.
Sa kasalukuyan, nasa 50% lang ang kapasidad para sa mga jeep, bus, lrt at mrt.
Ayon sa DOTr, mas hihigpitan nila ang monitoring sa mga sasakyang lumalabag sa panuntunan ng IATF At huhulihin nila ang mga ito.
Napansin anila ng iba na punuan na ang pagsasakay ng mga public utility vehicle nitong mga nakaraang araw kahit 50% capacity lang ang pinapayagan.
Nananawagan naman ang ahensya sa mga transport operator, driver at pasahero na sumunod sa protocols upang makaiwas sa aberya at hawahan ng Covid-19. —sa panulat ni Drew Nacino