Nailibing na ng Bureau of Corrections (BuCor) ang nasa 60 bangkay ng mga Persons Deprived of Liberty (PDL).
Alas-3 ng madaling araw kanina nang magpunta ang mga tauhan ng BuCor sa isang punerarya sa Muntinlupa para kunin ang nasabing bilang ng mga bangkay.
Nailibing naman ang mga ito alas-7 ng umaga kanina Sa New Bilibid Prison cemetery.
Nabatid na ilan sa mga bangkay ay 11 buwan nang nasa morgue.
Noong Nobyembre 9, sampung bangkay ng PDL ang inilibing ng ahensya matapos madiskubre ang nasa 176 na unclaimed bodies ng PDL na nakatambak sa morgue ng naturang punerarya.
Paliwanag ni BuCor officer-in-charge Gregorio Catapang, kabuuang bilang ito ng mga nasawing PDL mula pa noong Disyembre ng nakaraang taon.
Pero, iginiit naman niya na kaya nakatambak ang mga naturang bangkay ay marahil sa kakulangan ng maayos na sistema o hindi agad na naabisuhan ang mga kamag-anak.
Mababatid na sa protocol ng ahensya, kapag lumagpas na sa 90 araw na hindi pa nakukuha ang mga bangkay ay inililibing na ang mga ito sa naturang sementeryo.