Kinumpirma ng Bureau of Immigration (BI) na nakalabas na ng bansa ang dating ministro ng Iglesia ni Cristo na si Ka Lowell Menorca.
Ayon sa tagapagsalita ni Immigration Commissioner Ronni Heron na si Nikki Reyes, sinita lamang ng kanilang mga tauhan si Menorca kagabi ngunit dahil walang hold departure order kay Menorca, pinayagan nila itong makalabas ng bansa patungong Vietnam.
Nauna rito, sinabi ni Attorney Trixie Cruz-Angeles na nakausap niya kagabi ang kliyente niyang si Menorca at nagsumbong ito sa kanya na pinipigilan umano siyang makaalis dahil sa isang hold departure order.
Nang tumawag muli si Menorca sa kanya, pinayagan na umano siya ng Bureau of Immigration na makaalis.
Sa huli nilang pag-uusap, sinabi umano ni Menorca na kapag siya’y aalis na, tatawag muli ito sa kanya.
Subalit hindi na iyon nakatawag muli.
Una nang napaulat na nawawala si Menorca at pamilya nito at, ayon pa sa abogado niyang si Angeles, may banta umano sa kanyang buhay.
Ngayong araw sana ang pagpapatuloy ng pagdinig para sa petitions for a writ of amparo na isinampa ng kanyang mga kamag-anak, ngunit hindi nakadalo si Menorca.
By Avee Devierte | Aya Yupangco (Patrol 5)