Paulit – ulit na lamang ang mga isyung ibinabato ng mga detractors sa Commission on Elections (COMELEC).
Kasunod ito ng ginawang pagwa-walk out ni dating Commission on Elections Sixto Brillantes sa joint congressional hearing sa automated election system.
Ayon kay Brillantes, mas maraming dapat na pagtuunan ng pansin sa darating na eleksyon kaysa ang usapin ng print vote receipt na ilang beses nang isinantabi ng COMELEC
Aniya, bukod sa vote buying ay maaring patagal ng print vote receipt ang proseso ng pagboto.
“Hindi po puwede kasi nakakalat ang trabaho niyan, madaming tumitingin diyan eh, Smartmatic, COMELEC, mga commissioner, mga senior staff, hindi puwedeng dayain yan, ang problema sa mga ito, duda lang sila eh, gusto nila ngayong magkaroon ng sigurado pero kung ano naman ang nakalagay sa balota ay yun naman talaga ang binabasa eh.” Ani Brillanes.
Binigyan naman ng 9.5 na score ni Brillantes ang Chairman ngayon ng COMELEC na si Andres Bautista.
Ayon kay Brillantes, ito ay dahil pagsisikap ni Bautista na maging transparent sa kanilang mga ginagawang paghahanda sa eleksyon.
Samantala, sinabi ni Brillantes na handa siyang tumulong at sumuporta upang maging maayos at malinis ang darating na halalan.
“Wala naman akong problema tapos na ang isang taon ang aking retirement puwede na akong bumalik sa practice, pero hindi na siguro na lang, magco-consultancy at tutulong na lang tayo para maging maganda ang eleksyon natin.” Dagdag ni Brillantes.
By Rianne Briones | Balitang Todong Lakas