Muling humirit ng paglilinaw ang ilang miyembro ng Dolefil Agrarian Reform Beneficiaries Cooperative (DARBC) sa Polomolok, South Cotabato, hinggil sa status ng writ of execution na inilabas ng Cooperative Development Authority (CDA) noong Pebrero 24, 2026.
Sinasabing nais malaman ng mga miyembro kung maaari nang ipatupad ang kautusan at kung ano ang mga susunod na hakbang ng ahensya upang maisakatuparan ito.
Nabatid na umabot na sa Court of Appeals (CA) ang usapin, kaya may mga lumutang na tanong kung paano maaapektuhan ng nakabinbing usapin ang pagpapatupad ng naunang desisyon ng CDA.
Gayunman, hindi umano awtomatikong nangangahulugan ang paghahain ng kaso sa CA na suspendido na ang pagpapatupad ng kautusan. Nakasalalay ito sa mismong utos ng korte at sa saklaw ng anumang injunction na inilabas nito.
Dahil dito, hinihiling ng grupo sa CDA na linawin kung maaari nang ipatupad ang writ of execution o kung may umiiral na legal na hadlang sa pagpapatupad nito.
Ayon sa isang miyembro ng DARBC, dapat ipaliwanag ng ahensya ang mga susunod na hakbang kung maaari nang ipatupad ang kautusan. Kung may suspensiyon o limitasyon naman, nararapat din aniyang linawin ang legal na batayan nito.
Sinabi rin ng miyembro na mahalagang mabigyang-linaw ang usapin dahil maaaring maapektuhan ang mga karapatan at interes ng mga kasapi ng kooperatiba.
Aniya, dapat ding mabigyan ng patas na pagkakataon ang lahat ng panig na maipahayag ang kanilang posisyon sa pamamagitan ng tamang proseso.
Sa ngayon, hinihintay ng mga miyembro ang opisyal na paliwanag ng CDA at ng mga nakaupong DARBC officials tungkol sa kasalukuyang status ng writ of execution at sa mga susunod na hakbang alinsunod sa batas at sa anumang umiiral na kautusan ng korte.
