Sinimulan na ng House Prosecution Panel ang oral arguments sa Senate Impeachment Court para pagdebatehan at sabihin ang pananaw ng magkabilang panig hinggil sa voting threshold o kinakailangang boto mula sa mga senator-judge para sa conviction.
Sa pagsisimula ng Day 29 ng impeachment trial, naghain ng mosyon si House Lead Prosecutor Gerville Luistro para hilingin sa Senate Impeachment Court ang pagbabago sa mamumuno sa oral arguments.
Ayon kay Luistro, sa halip na si House Prosecutor Leila de Lima, si House Prosecutor Chel Diokno na lamang ang haharap para sa oral arguments.
Sa kanyang opening oral argument, binigyang-diin ni Diokno ang kahalagahan na magkaroon ng pagkakasundo sa voting threshold ang mga senator-judges.
Pinaboran ni Diokno ang mga sentimyento, pananaw, at karanasang ibinahagi ng mga amici curiae na dumalo sa nakaraang paglilitis na ang threshold vote ay hindi “fixed” sa labing-anim mula sa two-thirds na bilang ng 24 na senador.
Nabanggit din ni Diokno ang “The Value of Avelino v. Cuenco.” Ang numero sa threshold vote para sa conviction ay nakadepende sa “coercive power” ng Senado.
Ibig sabihin nito, nasa kapangyarihan ng Senado na pilitin o obligahin ang isang miyembro na dumalo sa proceedings sa pamamagitan ng mga legal na proseso o sanctions na pinapayagan ng rules.
Para kay Diokno, kung 24 ang mga senador at labing-dalawa lamang ang nasa loob ng session hall, hindi automatic na binibilang sa quorum ang isang miyembrong wala sa sesyon. | via Geli Mendez (DWIZ Patrol)
