Kinalampag ni House Senior Deputy Minority Leader Leila de Lima ang Pasig Regional Trial Court dahil sa pagpapatupad ng preliminary injunction laban sa P85 wage hike sa National Capital Region.
Dismayado at nanghihinayang si De Lima sa naturang desisyon dahil lalo lamang nitong pinapatagal ang paghihirap ng mga manggagawa na matagal nang naghihintay at umaasa ng dagdag sa kanilang kita.
Kinuwestiyon din ni De Lima kung bakit pahirapan pang maibigay sa mga naghihirap na manggagawa ang kakarampot na nga lang na umento at malayo pa ito sa talagang nararapat na matanggap ng mga manggagawa.
Hinamon din niya ang mga petitioners-employers na naghain ng petisyon laban sa wage hike, matapos itakda ng korte ang P10-billion injunction bond.
Kataka-taka para kay De Lima na kung sinasabi ng mga employer na hindi nila kayang sagutin ang dagdag na pasahod, bakit mas kaya nila umanong mag-post ng bond na umaabot sa P10 billion?
Para kay De Lima, hindi dapat paulit-ulit na ipagkait sa mga manggagawa ang kaunting ginhawa dahil lamang kaya nilang magtiis at magtrabaho sa kabila ng hindi makatarungang sahod.
