Maaaring maharap sa contempt of court ang sinumang testigong hindi sisipot sa impeachment trial matapos makatanggap ng subpoena mula sa Senate Impeachment Court.
Ayon kay Impeachment Court Spokesman Atty. Regie Tongol, obligadong sundin ng mga testigo ang subpoena dahil bahagi ito ng mandatory process ng paglilitis.
Ipinaliwanag ni Tongol na walang karapatan ang isang testigo na basta na lamang tumangging humarap kapag pinadalhan ng subpoena.
Gayunman, maaari itong hindi ipatupad kung walang kaugnayan ang testimonya sa kaso, ginagamit ang subpoena para manggipit, o may mali sa pagkaka-isyu nito.
Isa sa mga inaasahang haharap sa mga susunod na pagdinig ay si Office of the Vice President Chief of Staff Atty. Zuleika Lopez, na pinadalhan na ng subpoena bilang testigo sa impeachment trial ni Vice President Sara Duterte. | Sa panulat ni Jordan Gutierrez
