Ipagpapatuloy ng Department of Labor and Employment (DOLE) ang paggawa ng mga de-kalidad at marangal na trabaho sa gitna ng iginigiit ng ilang labor group na mga kahinaan sa job market ng bansa.
Ayon kay Labor Secretary Francis Tolentino, napapanahon na ang paggawa ng mga trabahong hindi lamang de-kalidad at marangal kundi may sapat na sweldo at handa sa mga hamon ng makabagong workplace.
Samantala, iginiit naman ng labor group na Sentro na dapat ikonsidera ng DOLE ang 4.8% na unemployment rate noong Mayo at ang mga trabahong kalimitang inaalok sa mga job fair, tulad ng accommodation and food services, administrative and support services, at construction, na pawang mga contractual at project-based na trabaho.
Ayon kay Sentro Secretary General Josua Mata, patuloy na gumagawa ang ekonomiya ng mga trabahong hindi makatarungan at hindi makatutulong upang isustento ang mga pamilya ng mga manggagawa.
Dahil dito, nananawagan ang labor group sa pamahalaan na tutukan ang job security, pagpapalakas sa public employment programs, at ang isang komprehensibong polisiya sa industriya na nagtitiyak na panatag, produktibo, at maayos ang sahod ng mga inaalok na trabaho. | Sa panulat ni Anjo Riñon
