Nagsagawa ng malawakang balasahan ang Land Transportation Office (LTO) sa mga district head ng National Capital Region (NCR) kasunod ng pagkakaaresto sa tatlong hinihinalang fixer na sangkot umano sa iligal na pagpoproseso ng student driver’s permits at driver’s licenses.
Ayon kay LTO Chief Assistant Secretary Markus Lacanilao, bahagi ito ng patuloy na reorganisasyon ng ahensya, upang mapalakas ang pananagutan at matiyak na walang kawani ang sangkot o nagbibigay-proteksyon sa mga ilegal na gawain sa loob ng mga tanggapan.
Matatandaang naaresto ang tatlong empleyado ng LTO sa isang entrapment operation noong June 29 sa West Manila District Office at East Avenue Central Office.
Sa ngayon, hinikayat ng LTO ang publiko na direktang makipagtransaksyon sa mga opisyal na kawani ng ahensya at agad na i-report ang anumang irreguralidad o aktibidad ng mga fixer, para mapabilis ang kaukulang aksyon at mapanatili ang integridad ng serbisyo sa publiko. | Sa panulat ni Reabelle Medina
