Nais ng Department of Energy na amyendahan ang Downstream Oil Industry Deregulation Act of 1998 upang mabigyan ang ahensya ng mas malawak na kapangyarihan laban sa fuel hoarding at mapalakas ang seguridad sa suplay ng enerhiya sa bansa.
Ayon kay Energy Secretary Sharon Garin, wala sa kasalukuyang batas ang awtoridad ng ahensya na kumpiskahin ang mga produktong petrolyo ng hinihinalang iligal na iniimbak.
Sa panukalang pag-amyenda, nais ng DOE na magkaroon ng kapangyarihang kumpiskahin ang mga hoarded petroleum products at magpataw ng mas mabigat na parusa sa mga lalabag.
Kabilang dito ang multang 250,000 hanggang 500,000 pesos o pagkakakulong ng anim na buwan hanggang dalawang taon.
Iminumungkahi rin na obligahin ang mga kumpanya ng langis na magpanatili ng reserbang katumbas ng 60 araw na suplay.—sa panulat ni Jordan Gutierrez
