Kinuwestyon ni Caloocan City 2nd District Rep. Edgar “Egay” Erice ang pagdeklara ng World Bank na upper-middle-income country na ang Pilipinas.
Ayon kay Cong. Erice, hindi nito sinasalamin ang tunay na kalagayan ng maraming pamilyang Pilipino dahil ang gross national income per capita ay natatakpan ng malaking agwat sa pagitan ng mayayaman at mahihirap.
Hinimok ng kongresista ang pamahalaan na maglabas ng mas detalyadong datos ng kita ayon sa iba’t ibang economic class upang makagawa ng mas angkop na mga programa para sa bawat sektor.
Samantala, pinuna rin ni Kamanggagawa Party-list Rep. Eli San Fernando ang pagdiriwang ng gobyerno sa bagong klasipikasyon habang mababa pa rin ang sahod ng maraming manggagawa.
Nanawagan si Cong. San Fernando ng mas mataas na sahod na naaayon sa antas ng isang upper-middle-income country, at iginiit na nananatiling salat ang malaking bahagi ng mga pamilyang Pilipino sa kabila ng bagong pagkilala sa ekonomiya ng bansa.—sa panulat ni Jordan Gutierrez
