Nagsumite ng komento ang defense team ni Vice President Sara Duterte sa pretrial order ng Senate Impeachment Court bago ang itinakdang deadline kahapon, Hulyo 2.
Ayon kay Senate Secretary at Impeachment Clerk of Court Renato Bantug Jr., wala siyang nakikitang anumang dahilan upang maantala ang pagsisimula ng impeachment trial sa Lunes, Hulyo 6.
Tumanggi namang magbigay ng detalye si defense lawyer Michael Poa tungkol sa nilalaman ng kanilang isinumiteng komento, na aniya ay alinsunod sa mga tuntunin ng impeachment proceedings.
Tiniyak ni Secretary Bantug na rerepasuhin pa niya ang dokumento upang matukoy kung may mga bahagi ng pretrial order na nangangailangan ng pagbabago, pero wala naman aniyang kahilingan mula sa kampo ni VP Sara para ipagpaliban ang paglilitis.
Kinumpirma rin ng Impeachment Clerk of Court na ang depensa lamang ang nagsumite ng komento sa pretrial order dahil nagpasya ang House Prosecution Panel na hindi maghain ng komento sa nasabing dokumento.—sa panulat ni Jordan Gutierrez
