Sinimulan na ng Department of Labor and Employment ang konsultasyon para sa posibleng pagtataas ng minimum wage sa iba pang rehiyon kasunod ng pag-apruba sa 85 pesos minimum wage increase para sa mga manggagawa sa Metro Manila.
Ayon kay Labor Secretary Francis Tolentino, magsasagawa rin ang ahensya ng information campaign upang matiyak ang pagsunod ng mga negosyo sa mga patakaran laban sa wage distortions.
Nagsasagawa na anya ng konsultasyon ang iba’t ibang Regional Tripartite Wages and Productivity Boards, habang nakatakda ring repasuhin ang mga panukalang wage increase sa Central Visayas, Central Luzon, at CALABARZON.
Umaasa rin ang kalihim na lalo pang mapapalakas ng National Wages and Productivity Board ang koordinasyon ng pamahalaan, mga employer, at mga manggagawa sa buong bansa.—sa panulat ni Jordan Gutierrez
