Lalo pang lumakas ang Severe Tropical Storm Francisco, na may international name na Mekkhala, habang patuloy itong kumikilos pa-west northwest sa Philippine Sea, ayon sa PAGASA ngayong araw.
Namataan ang sentro ng bagyo sa layong humigit-kumulang 1,350 kilometro silangan ng Southeastern Luzon. Taglay nito ang lakas ng hanging aabot sa 100 kilometro kada oras malapit sa gitna, na may pagbugsong umaabot sa 125 km/h. Kumikilos ang bagyo sa bilis na 25 km/h pa-west northwest.
Maaapektuhan ng trough o extension ng bagyo ang Bicol Region at Eastern Visayas, na posibleng makaranas ng maulap na kalangitan na may kalat-kalat na pag-ulan at thunderstorms. Posibleng magkaroon ng flash floods at landslides sa mga naturang lugar dahil sa katamtaman hanggang malalakas na pag-ulan.
Samantala, ang Mindanao, natitirang bahagi ng Visayas, at Palawan ay makararanas din ng maulap na papawirin na may pabugsu-bugsong ulan at thunderstorms dahil sa southwest monsoon o habagat, na maaari ring magdulot ng pagbaha at pagguho ng lupa.
Sa Metro Manila at iba pang bahagi ng Luzon, inaasahan naman ang bahagyang maulap hanggang maulap na kalangitan na may isolated rain showers o thunderstorms dahil sa localized thunderstorms, na may posibilidad pa rin ng biglaang pagbaha dahil sa malalakas na pag-ulan.
Inaasahan ang pagsikat ng araw bandang 5:28 a.m. at paglubog nito mamayang 6:28 p.m.
