Binigyang-diin ni Senate President Pro Tempore Panfilo “Ping” Lacson na hindi niya pipirmahan ang Bicam report ng panukalang 2026 national budget kung itutuloy ng Bicameral Conference Committee ang malaking dagdag-pondo para sa mga kontrobersyal na aid program at ang bilyun-bilyong pisong alokasyon para sa farm-to-market roads.
Binatikos ni Senador Lacson ang pag-apruba sa 51.6 bilyong pisong pondo para sa kontrobersyal na Medical Assistance to Indigent and Financially Incapacitated Patients o MAIFIP ng Department of Health, na tinuturing ng ilan bilang “bagong mukha ng pork barrel.”
Nakabatay lamang anya sa guarantee letters ng mga pulitiko ang MAIFIP at hindi sumusunod sa Universal Health Care Act.
Iginiit pa ni SP Pro Tempore na ang lahat ng pondong may kinalaman sa kalusugan ay dapat mapasailalim sa Universal Health Care Program ng Department of Health.
Dagdag pa ni Senador Lacson, ang mga guarantee letter mula sa mga pulitiko ay maggagarantiya lamang ng patronage politics, hindi ng tunay na pangangailangang pangkalusugan ng mga Pilipino, lalo na ng mga mahihirap.
—Sa panulat ni Daniela De Guzman
