Iimbestigahan ng Department of Public Works and Highways ang mga napinsalang imprastraktura matapos ang pananalasa ng bagyong Uwan sa bansa.
Ayon kay DPWH Secretary Vince Dizon, layunin ng nasabing hakbang na matukoy kung nasira ba ang mga imprastraktura dahil sa bagyo o nagkaroon ng pagkukulang sa konstruksyon ng mga ito.
Tiniyak ni Sec. Dizon na isasabay sa imbestigasyon ang pagkukumpuni sa mga nasirang imprastraktura.
Partikular na tinukoy ng kalihim na kabilang sa kanilang mga iimbestigahan ang nasirang floodgates sa Estero de Paco, sa Maynila.
Nabatid na lumabas na sa Philippine Area of Responsibility ang bagyong Uwan, ngunit inaasahang papasok muli ito sa PAR mamayang gabi.
