Nanawagan ang BPO Industry Employees Network o BIEN sa Department of Labor and Employment na kumilos matapos mabalitaan ng grupo na “business as usual” ang ilang business process outsourcing companies habang nananalasa ang bagyong Uwan.
Ayon pa sa BIEN, may ilan pang mga kompanya na ginigipit ang mga empleyado nito na hindi makapasok dahil sa bagyo, at ang mga ayudang ibinibigay ng ilan sa mga ito ay sinasabing panakip-butas lamang dahil bigo silang unahin ang kaligtasan ng kanilang mga manggagawa.
Ilan lamang sa mga insidenteng iniulat sa grupo ay ang pagbibigay ng isang kompanya ng 1,000-peso allowance at libreng pagkain sa mga nagtrabaho sa gitna ng bagyo, habang pinatawan naman ng disciplinary action ang mga tumanggi o bigong makapasok para magtrabaho.
Dagdag pa ng BIEN, ganito rin ang sitwasyon noong humagupit ang bagyong Tino, at noong niyanig ng magnitude 6.9 na lindol ang Cebu City.
Kaugnay nito, nauna nang ipinananawagan ni Labor Secretary Bienvenido Laguesma sa mga employer na ikonsidera ang kaligtasan ng kanilang mga obrero, lalo na ang mga labis na naapektuhan ng bagyong Uwan.
