Patay ang dalawang babae matapos makaladkad ng isang van at mabangga ng isang pick-up truck sa Batangas.
Pauwi na ang mga biktima sa Marinduque at pansamantalang tumigil ang kanilang sasakyan sa Batangas para kumain at magbanyo.
Nahagip ang mga ito ng L-300 van na minamaneho ng nagngangalang Noli Rojero at nang tumilapon ang mga biktima sa kabilang kalsada, ay nabundol naman ang mga ito ng truck na minamaneho ni Richard Perol.
Kaagad namang ikinasawi ng mga biktima ang naganap na insidente.
Ayon kay Pol. Maj. Allan Nidua, Deputy ng Sto. Tomas City Police Station, mabilis ang takbo ng dalawang sasakyan.
Depensa naman ni Perol, mabagal lamang ang kanyang pagpapatakbo at nagulat na lamang ito nang may tumama sa kaniyang wind shield.
Habang inamin naman ni Rojero na mabilis ang kaniyang pagpapatakbo dahil kailangan umano nitong isugod ang dalawang buwang kambal sa ospital.
Naiuwi na ang mga labi ng biktima sa kanilang pamilya sa Marinduque habang nasa kustodiya na ng mga otoridad ang dalawang driver na mahaharap sa kaukulang kaso. —sa panulat ni Hannah Oledan