Napanatili ng Pilipinas ang masiglang labor market sa kabila ng epekto ng pandemya.
Ito, ayon sa National Economic Development Authority (NEDA), ay makaraang bumaba ang unemployment rate sa 4.5% nitong Oktubre kumpara sa 7.4% sa kaparehong panahon noong nakaraang taon.
Ayon kay NEDA Director General Arsenio Balisacan, nagbigay- daan ang muling pagbubukas ng face-to-face classes at panunumbalik sa full capacity ng iba’t ibang sektor upang mabawi ang nawalang kita noong kasagsagan ng pandemya.
Tumaas naman ang labor force participation rate sa 64.2% noong Oktubre kumpara sa 62.6% sa kaparehong panahon noong isang taon na katumbas ng karagdagang 2 million individuals na nagkaroon ng trabaho.
Samantala, tiniyak ng NEDA na magpapatupad ang gobyerno ng mga emergency employment program upang matugunan ang kakulangan ng trabaho sa bansa. —sa panulat ni Hannah Oledan
