Isa ang patay habang anim na pasahero ng tricycle ang sugatan matapos mabangga ng Sports Utility Vehicle (SUV) sa Antipolo City, Rizal.
Kinilala ang nasawing si Jehazel Embang na naisugod pa sa Antipolo District Hospital, pero hindi na umabot ng buhay dahil sa mga natamo nitong matinding pinsala sa ulo at katawan.
Ginagamot din sa nasabing ospital ang iba pang pasahero na sina Jake Iver Labao, Rhian Aguilar, Sophia Feliciano, Mitchil De-Erit, anak nitong si John Mendriz Seria at driver na si Jobert Labao.
Ayon sa Antipolo City Police, mag-a-alas dose ng tanghali nang maganap ang aksidente sa National Road, Barangay Santa Cruz.
Nawalan umano ng preno ang Isuzu Highlander SUV na minamaneho ni Juanito Bulseco at sumalpok sa tricycle dahilan upang bumaligtad ito.
Nasa kustodiya na ng pulisya si Bulseco at mahaharap sa kasong reckless imprudence resulting to homicide and multiple physical injuries. - sa panulat ni Hannah Oledan
