Malabo pang maibalik ang suplay at linya ng kuryente sa Quezon at Aurora province matapos ang pananalasa ng Bagyong Paeng.
Kabilang sa mga naapektuhan ang Quezon Electric Cooperative 1 (QUEZELCO 1) at Aurora Electric Cooperative (AURELCO) na hindi parin nakakatanggap ng kuryente hanggang sa ngayon.
Ayon kay National Grid Corporation of the Philippines (NGCP) Spokesperson Cynthia Alabanza, hindi pa nila masabi kung kailan maibabalik ang operasyon ng mga kuryente sa dalawang nabanggit na lalawigan.
Iginiit ni Alabanza na kanila pang pinag-aaralan ang sitwasyon sa nabanggit na rehiyon dahil karamihan umano sa mga linya ng kuryente ay nadamay sa mga nagbagsakan at nagliparang mga sanga ng puno dahil sa nagdaang bagyo.
Sa ngayon, nagsasagawa pa rin ng clearing operations ang NGCP sa ilang lugar na naapektuhan ng power outage.
