Sugatan ang apat na indibidwal makaraang mahulog sa bangin ang kanilang sinasakyan sa Kibungan, Benguet.
Kabilang sa mga sugatan sina Filmore Esong, Sr., 41-anyos, Bernadette Esong, 39-anyos, at dalawang menor de edad na hindi na pinangalanan.
Sa imbestigasyon ng mga otoridad, patungo sana sa La Trinidad, Benguet ang mga biktima nang nawalan ng kontrol ang kanilang sinasakyan at dumiretso sa 250 metrong lalim na bangin sa Sitio Abubuyan, Brgy. Poblacion.
Agad na isinugod sa Benguet General Hospital ang apat na sugatan na ngayon ay patuloy pang nagpapagaling.
Sa ngayon, nagpapatuloy pa ang imbestigasyon sa naganap na insidente habang nanawagan naman sa publiko ang mga otoridad na siguraduhing nasa kondisyon ang sasakyan bago ibiyahe sa lansangan upang maiwasan ang aksidente.
