InIhayag ng Pamahalaang Lokal ng Maynila na kanilang ipagpapatuloy ang paghahatid ng libreng RT-PCR Test para sa mga residente.
Pahayag ito ni Manila Mayor Honey Lacuna kasunod ng ulat na dumarami ang mga taong tinatamaan ng COVID-19 kanilang lungsod.
Ang naturang test ay maaaring i-avail sa anim na City-run hospitals na kinabibilangan ng Gat Andres Bonifacio Memorial Medical Center; Ospital ng Tondo; Justice Abad Santos General Hospital; Ospital ng Sampaloc; Ospital ng Maynila; at Sta. Ana hospital.
Sinabi ni Lacuna na ang ipinagkaloob ng lokal na Pamahalaan ay malaking tulong para sa mga residente dahil ang presyo ng RT-PCR tests sa mga private institutions ay nagkakahalaga ng P3,800 o higit pa.
Sa ngayon, ang kabuuang bilang ng mga indibidwal na nabigyan na ng libreng swab tests sa Maynila ay umabot na sa 213,310.
Samantala, nanawagan naman ang alkalde na patuloy na sumunod sa ipinatutupad na public health standards upang maiwasan ang tumataas na bilang ng COVID-19 cases sa bansa.
