Pinayuhan ng Commission on Election (Comelec) ang publiko na iwasan ang pagpapakalat ng mga pekeng impormasyon sa social media hinggil sa naganap na eleksyon.
Ayon kay Commissioner George Garcia, may kaukulang parusa ang isang indibidwal na magpapakalat ng maling impormasyon sa lahat ng social media platforms.
Sinabi ni Garcia na dapat maging maingat ang publiko sa pagpapakalat ng mga balita na may kaugnayan sa kredibilidad at integridad ng proseso ng mga nasirang vote counting machines at mga problema sa mga balota.
Base sa Section 50 ng Omnibus Election Code, ang sinumang gumawa ng misrepresentation o panlilinlang sa publiko ay isang election offense at may parusang pagkakakulong mula 1 taon hanggang 6 na taon.
