Muling nagpatupad ng rigudon ang pamunuan ng Philippine National Police (PNP) sa mga opisyal nito.
Pirmado ni Director for Personnel and Records Management P/MGen. Rolando Hinanay ang kautusan na epektibo sa araw na ito, Pebrero a-3.
Kabilang sa mga Heneral na isinailaim sa rigudon ay sina P/BGen. Eliseo Cruz na mula sa CALABARZON Regional PNP ay ililipat bilang Deputy Director ng Area Police Command sa Visayas.
Papalit naman kay Cruz si P/BGen. Antonio Yarra na mula sa Quezon City Police District (QCPD) na papalitan naman ni P/BGen. Remus Medina na mula sa PNP Drug Enforcement Group (PDEG).
Habang ang dating tagapagsalita ng PNP na si P/BGen. Bernard Banac na mula sa PNP Training Service ay itinalaga na bilang Regional Director ng Eastern Visayas PNP.
Ang panibagong balasahan ay bunsod ng nakatakdang pagreretiro ng ilang mga opisyal kaya’t kailangang punuan sa lalong madaling panahon ang mga mababakante nilang posisyon. —sa ulat ni Jaymark Dagala (Patrol 9)
