Pinayuhan ang Bureau of Corrections na kumonsulta muna sa Department of Justice at mga Local Government Unit bago magsara ng mga kalsada sa loob ng mga Compound ng mga bilangguan.
Ayon kay Justice Secretary Menardo Guevarra, bilang mother agency, dapat magkaroon ang BuCor ng maayos na kortesiya sa mga LGU na may hurisdiksyon sa mga properties ng Bureau of Corrections.
Pinag-usapan na anya ang naturang issue, partikular ang pagsasara ng daan sa loob ng compound ng New Bilibid Prison, Muntinlupa City, nang pulungin ng Kagawaran ang mga opisyal ng BuCor noong November 29.
Magugunitang idineklara ng Muntinlupa Local Government si BuCor Director Gerald Bantag na Persona Non Grata makaraang ipag-utos ang pagpapasara isa sa mga main road sa Katarungan Village.
Samantala, inihayag naman ni Guevarra na pumayag na ang BuCor na muling buksan ang isinarang kalsada para sa mga residente. —sa panulat ni Drew Nacino
