Isang makasaysayang salubong sa San Juanico Bridge ang ginawa ng mga taga-suporta nina Uniteam presidential aspirant Ferdinand ‘Bongbong’ Marcos Jr. at vice presidential bet Sara ‘Inday’ Duterte, kahapon, November 30.
Ayon kay Marcos, ang tagpong ito ay pagkakaisa ng Hilaga at Timog na sumisimbolo sa pagkakaisa ng Luzon, Visayas at Mindanao sa likod ng BBM-Sara Uniteam.
Naniniwala rin si Marcos na sa pamamagitan ng mapag-kaisang liderato ng dalawa ay makakamtam ng bansa ang pagkakaisa, kapayapaan at progreso.
Dagdag pa ni Marcos, ang makasaysayang pagsasanib pwersa ng mga taga-suporta nilang dalawa ni Sara ay hudyat ng tagumpay ng mamamayang pilipino sa matinding hamon na dala ng pandemya.
Ang San Juanico Bridge na pinuno ng mga taga suporta ni BBM at Mayor Sara na pawang nakabihis kulay pula at berde ay may kabuuang haba na 2,200 metro. Ito ay bahagi ng Pan-Philippine Highway na proyekto ni dating Pangulo Ferdinand Marcos at inihandog sa asawang si Imelda Marcos na kilalang waraynon.
