Mahigit 42 milyong Pilipino na ang nagpatala sa vaccination registration database ng mga lokal na pamahalaan sa buong bansa.
Ayon kay Interior Chief Eduardo Año, umabot na sa 42,267,179 mga indibidwal na kabilang sa priority list ng vaccination program ng gobyerno ang nakaregister na hanggang nitong July 17.
Aniya, magandang balita ito dahil malapit na sa kalahating porsyento ng kabuuang populasyon ang handa nang magpabakuna.
Maliban dito, sinabi pa ni Año na mayroong 28,598 quarantine facilities sa bansa na magagamit ng mga pasyenteng may COVID-19.
Habang nasa 25,989 COVID-19 vaccination action plans naman ang naisumite ng local government units at 36,823 ang naitalagang barangay health emergency response teams. —sa panulat ni Hyacinth Ludivico
