Nakikismpatiya ang Philippine National Police (PNP) sa sentimiyento ni Pangulong Rodrigo Duterte laban sa mga lokal na Opisyal na prumutor pa sa paglabag sa minimum health and safety protocols.
Ayon kay PNP Chief P/Gen. Guillermo Eleazar, maging siya ay nadidismaya tulad ng Pangulo dahil mismong ang mga tao na dapat sanang nangungunang sumunod sa batas ay siya pang numero unong lumalabag dito.
Giit ng PNP Chief, dapat lang managot ang mga Lokal na Opisyal tulad ng mga Konsehal at Barangay Captain o maging Kagawad sa tila pagbabalewala sa mga tagumpay na tinamasa ng bansa sa paglaban sa coronavirus disease 2019 (COVID-19) pandemic.
Pero nilinaw nito na tulad sa mga quarantine violators ay walang arestuhang magaganap sa mga Lokal na Opisyal sa halip, maaari nila itong imbitahan sa presinto para kunan ng paliwanag.
Lahat aniya ay daraan sa tamang proseso at kung sakaling ipinag-utos na ng korte na arestuhin ang mga pasaway na lokal na opisyal ay kanila itong gagawin.
Kasunod nito, muling kinalampag ni Eleazar ang lahat ng mga Police Commander sa buong bansa na bantayan ang kanilang area of responsibility dahil tiyak na sasamain sila kapag napatunayang sila’y nagpabaya.