Hinikayat ng ilang alkalde ng Metro Manila ang publiko na sumunod muna sa payo ng mga medical experts kaugnay sa paggamit ng anti-parasitic drug na Ivermectin laban sa coronavirus disease 2019 (COVID-19).
Ayon kay Pasig City Mayor Vico Sotto, huwag kaagad nagpapatangay sa mga aniya’y conspiracy theories hinggil sa naturang gamot.
Hindi aniya sapat na basehan ang iilang positibong balita lamang hinggil sa Ivermectin para sabihing nakagagamot nga ito laban sa COVID-19.
Mas makabubuti aniya na makinig pa rin sa mga eksperto hinggil dito.
Bagay naman na ipinahayag din ni Taguig City Mayor Lino Cayetano.
Ayon kay Cayetano, oras naman na tuluyan na itong aprubahan ng Department of Health (DOH) at ng Food and Drug Administration (FDA) ay hindi lamang suporta ang matatanggap nito mula sa alkalde, kundi tatangkilikin at bibilhin pa aniya nila ang naturang gamot.
