Handa ang mga pribadong ospital na magdagdag pa ng mga kamang ilalaan para sa mga pasyenteng may COVID-19.
Ito’y bilang pagtugon sa patuloy na pagsirit ng bilang ng kaso ng COVID-19 sa bansa.
Ngunit ayon kay Dr. Jose Rene De Grano, President ng Private Hospitals Association of the Philippines (PHAP), problema nila ang kakulangan sa tauhan.
Ani De Grano, walang problema kung sa pagdaragdag lang ng kama para sa mga COVID-19 patients, ngunit limitado na aniya ang staff ng mga private hospital para makatuwang sa pag-aalaga sa mga pasyente.
Una rito, inihirit ng Department of Health sa mga pribadong ospital na dagdagan ang bed allocation para sa mga pasyenteng tatamaan ng COVID-19.
