Nakapagtala ang ilang ospital sa Metro Manila ng mataas na bilang ng kaso ng COVID-19 sa bansa.
Kabilang sa mga ospital na maraming pasyenteng tinamaan ng COVID-19 ay ang Dr. Jose N. Rodriguez Memorial Hospital o Tala Hospital sa Caloocan.
Ayon kay Tala Hospital Chief Dr. Fritz Famaran, sumipa sa 85 kaso ng COVID-19 sa ospital, isa sa pinakamaraming bilang sa loob ng tatlong buwan.
Dagdag ni famaran, i-increase nila ang bed capacity at maaaring isara ang mga walk-in patients na pupunta sa ospital.
Posible rin aniyang mailipat sa ibang government hospital ang mga pasyenteng walang COVID-19 upang hindi ito mahawa sa mga nagpositibo sa virus.
Buko dito, dumoble rin ang naitalang na-admit sa St. Lukes Medical Center sa Taguig at Quezon City na mga pasyenteng nagpositibo sa COVID-19.
Tiniyak naman ng Cardinal Santos Medical Center sa San Juan na kahit dumami ang mga COVID-19 patients, kontrolado nila ang COVID-19 capacity at patuloy nilang ipinapatupad ang mahigpit na health protocols sa ospital.
Samantala, ipinatigil naman ng Association of Philippine Medical Colleges Inc. ang face to face internship at clerkship sa mga lugar na may pagtaas ng kaso ng naturang virus. —sa panulat ni Rashid Locsin
