Handa ang Armed Forces of the Philippines (AFP) na gawin ang mandato nitong ipagtanggol ang mga mangingisdang Pilipino at protektahan ang soberanya ng bansa sa West Philippine Sea.
Ito ang naging pagtitiyak ni Defense Sec. Delfin Lorenzana sa harap na rin ng ipinatupad na bagong batas ng china na armasan ang kanilang coast guard na nagpapatrulya sa pinag-aagawang teritoryo sa nasabing karagatan.
Una rito, kinastigo ni Sen. Riza Hontiveros si Lorenzana dahil sa tila pagiging malamig nito sa bagong batas na ipinatutupad ng China.
Pero sagot ni Lorenzana, sineseryoso niya ang bantang kalakip ng bagong batas ng china at sa katunayan aniya ay ikinaalarma niya iyon.
Una nang pinakilos ni AFP chief of staff Lt/Gen. Cirilito Sobejana ang western command ng Philippine Navy para palakasin pa ang puwersa ng Pilipinas sa bahaging iyon ng karagatan.
