Aprubado na ng Department of Trade and Industry (DTI) ang pagtaas ng presyo ng ilang pangunahing bilihin gaya ng sardinas, kape, canned meat, gatas, condiments at sabon.
Ayon kay DTI Undersecretary Ruth Castelo, hanggang 9% lamang ang pinapayagang taas-presyo sa mga naturang produkto at hindi kaagad maaaring magtaas ng presyo hanggat wala pang inilalabas na Suggested Retail Price (SRP) ang pamahalaan.
Dagdag pa ni Castelo, sisikapin ng DTI na utay-utayin ang pagtaas ng presyo ng mga produkto upang ‘di mabigla ang mga konsumer, posible rin aniya na maibalik sa dating presyo ang mga Noche Buena products dahil ibinaba lamang ang presyo nito para sa nagdaang kapaskuhan.
Samantala, taliwas naman sa pananaw ni Philippine Amalgamated Supermarkets Association President Steven Cua ang desisyong ito ng DTI dahil aniya hindi pa panahon para magtaas ng presyo dahil kakaunti pa rin ang mamimili kahit pa nitong holiday season dahil nagtitipid at wala pang sapat na pambili ang mga Pilipino.
Paglilinaw naman DTI, sasailalim naman umano sa masusing pag-aaral ang ilan pang hirit na taas presyo ng ilang manufacturer.—sa panulat ni Agustina Nolasco
