Nagpaabot ng pakikiramay ang buong hanay ng Philippine National Police (PNP) sa pagpanaw ni National Police Commission (Napolcom) Vice Chairman Atty. Rogelio Casurao.
Ayon kay PNP Spokesman P/Bgen. Ildebrandi Usana, labis nilang ikinalungkot ang pagyao ng isang mabuting tao at ama na iginagalang ng lahat ng kaniyang mga kasamahan.
Kasunod nito, ipinaaabot din ni PNP Chief P/Gen. Debold Sinas ang pagsaludo kay Casurao sa ngalan ng buong hanay ng pambansang pulisya.
Kasalukuyang nakalagak sa Arlington Memorial Chapels sa Araneta Avenue, Quezon City ang labi ni Atty. Casurao at nakatakda itong buksan sa publiko bukas, Enero 4 hanggang sa Martes, Enero 5.
Ihahatid naman sa huling hantungan si Casurao sa pamamagitan ng cremation sa Miyerkules, Enero 6 na sisimulan ng isang misa dakong alas 10:00 ng umaga na susundan ng cremation.