Maliban sa pagkasibak sa serbisyo, nahaharap din sa patumpatong na kasong administratibo at kriminal ang pulis Malabon na walang habas na nagpaputok ng baril nitong Bagong Taon.
Ito ang inihayag sa DWIZ ni Philippine National Police (PNP) Spokesman P/BGen. Ildebrandi Usana kasunod ng paggulong ng imbestigasyon kay P/SSgt. Karen Borromeo.
Ayon kay Usana, lumabas aniya sa paunang pagsisiyasat na nagkaroon ng pagtatalo sa pagitan nila Borromeo at ng kasintahan nito na nagtulak sa pulis na paputukin ang kaniyang baril.
Muling iginiit ni Usana, hindi kailanman nila kukunsintihin ang anumang maling gawain ng kanilang mga tauhan at tiyak na may kalalagyan ang mga ito.
