Ipatutupad ng pamahalaang lungsod ng Navotas ang bagong oras ng kanilang curfew simula bukas, ika-15 ng Disyembre.
Sa abiso na inilabas ng Navotas City local government unit (LGU), sinabi nito na mula ika-15 hanggang ika-23 ng Disyembre, alas-11 na ng gabi hanggang alas-2 ng madaling araw iiral ang curfew sa lungsod.
Sa kabila nito, wala namang itinakdang curfew sa mga nasa hustong gulang sa mga sumusunod na petsa: ika-24, 25, 31 ng Disyembre at ika-1 ng Enero.
Paliwanag ng Navotas LGU, ito’y para bigyang daan ang pagdalo ng mga residente nito sa tradisyunal na simbang gabi.
Nilinaw naman ng mga awtoridad na hindi pa rin pinapayagang makalabas ng kani-kanilang kabahayan ang menor-de-edad dahil sa pag-iral ng 24-hour curfew.
Samantala, ibabalik naman sa alas-8 ng gabi hanggang alas-5 ng umaga ang curfew hours sa lungsod simula sa ika-2 ng Enero sa susunod na taon.
