Nirepaso ng senado ang kanilang ipinatutupad na health protocol matapos magpositibo sa COVID-19 si Senador Ronald Dela Rosa at isa pang bisita na dumalo sa budget deliberation noong nakaraang linggo.
Ayon kay Senate President Vicente Sotto III, kanya nang inatasan ang secretariat ng senado na suriin ang pagiging epektibo ng kanilang umiiral na mga panuntunan laban sa COVID-19.
Ani Sotto, halos araw-araw ang isinasagawang disinfection sa buong gusali ng senado kasunod ng pagpositibo ni Dela Rosa at isang executive official na nagtungo doon.
Magugunitang noong Marso, niluwagan ng senado ang kanilang panuntunan at pinayagan ang virtual na pagdalo ng mga senador sa mga pagdinig at sesyon sa plenaryo para mapigilan ang pagkalat ng COVID-19.
Habang sa kalagitnaan ng taon, sinimulan namang kabitan ng mga acrylic panels ang lobby at plenary hall ng senado bilang pagsunod sa guidelines ng pamahalaan.
