Nanguna ang Police Regional Office 8 o Eastern Visayas sa nakapagtala ng pinakamaraming bagong kaso ng COVID-19 sa hanay ng Philippine National Police (PNP).
Ito’y makaraang madagdagan ng 74 ang mga pulis na dinapuan ng nasabing virus kaya’t umakyat na ang kabuuang bilang nito sa 7,419.
Batay sa datos ng PNP health service, 26 ang naitalang bagong kaso sa Eastern Visayas Region, 19 sa Central Luzon habang 12 naman sa National Operation Support Unit.
Lima naman ang naitala sa NCRPO, tatlo sa MIMAROPA, tig dalawa sa Cordillera gayundin sa Bicol Region habang tig isa ang naitala sa Cagayan Valley, Calabarzon, Central Visayas, Northern Mindanao at Caraga Region.
Nasa 460 naman ang total active cases sa hanay ng PNP makaraang gumaling ang nasa 40 pulis kaya’t umakyat na sa 6,936 ang total recoveries.
Nananatili naman sa 23 ang kabuuang bilang ng mga nasawing pulis dulot ng nasabing virus.