Pinaplano na ng singer na si Bryan White na siyang kumanta ng patok na patok ngayong theme song ng tambalang AlDub ang ‘God Gave Me You’ na bumisita sa Pilipinas.
Sa Facebook post ni White, inihayag nito ang kanyang pasasalamat sa kanyang Filipino fans sa pagmamahal ng mga ito sa kanyang kanta. Ikinatutuwa niya na pagkalipas ng higit 10 taon mula nang ginawa niya ang kanta, ay sikat pa rin ito at patuloy na pinakikinggan ng mga tao.
Sa ngayon, ayon kay White, tinatrabaho na nila ang kanyang magiging tour sa Pilipinas. Kaya sigurado na umano na makikita niya ang kanyang Filipino fans.
Ilang fans na rin kasi ng AlDub ang nagtu-tweet kay White patungkol sa pagsikat ng kanyang kanta sa Pilipinas dahil sa tambalan nina Alden Richards at Yaya Dub.
Katunayan, kahit nga si White, finallow na rin sa Twitter sina Alden at Maine Mendoza.
Kahapon, pumalo na sa 12 million ang tweets ng hashtag AlDub most awaited date na nag number 1 trending hashtag hindi lamang sa Pilipinas kundi sa buong mundo.
By: Jonathan Andal
