Pumalag ang ilang kandidato sa darating na halalan sa Mayo 13 hinggil sa viral video sa social media tungkol sa mga umano’y pre-shaded na balota.
Ayon kay reelectionist Senator JV Ejercito, maituturing aniya na unfair ang nasabing usapin kung totoo man dahil sa halos masunog na ang kanilang balat sa pag-iikot at pangangampaniya subalit mauuwi lang pala sa wala ang kanilang pinaghirapan dahil sa dayaan.
Kasunod nito, nanawagan si Ejercito sa Commission on Elections (Comelec) na imbestigahan kung may katotohanan ang lumabas sa naturang viral video upang maalis ang agam-agam ng publiko na mayruong pagtatangkang dayain ang resulta ng nalalapit na eleksyon.
Para naman kay senatorial bet Christopher Bong Go, tiwala naman siya sa kakayahan ng Comelec para sa pagkakasa ng imbestigasyon at ipinauubaya na niya rito ang paggawa ng karampatang aksyon.
Apela lang ni Go sa mga botante, iboto kung sino sa tingin nila ang karapatdapat at bantayang maigi ang kanilang boto upang hindi magamit sa pandaraya ng iilang mga pulitiko.
Nakasaad sa naturang viral video post na burado na ngayon sa Facebook ang isang regular ballot na kapag ginamitan ng UV light ay lalabas umano ang mga pre-shaded na pangalan ng kandidato.
Kaya’t mapawawalang bisa ang boto ng isang botante kahit pa mag-shade pang muli ito sa kaniyang nais ihalal dahil sa hindi na ito tatanggapin ng vote counting machine (VCM).
