Sinampahan ng kasong katiwalian ng isang transport group si Land Transportation Franchising and Regulatory Board Chairman Martin Delgra.
Inakusahan ni Efren de Luna ng Alliance of Concerned Transport Organizations (ACTO) ng pagiging bias si Delgra dahil umano sa pagbibigay nito ng prangkisa sa public utility vehicles.
Batay sa inihaing reklamo ni De Luna sa Ombudsman. Ilang ruta lamang at franchise applicants ang kinilala ng LTFRB at binigyan ng prangkisa.
Tinutukoy dito ng ACTO ang paglagda nina Delgra at Board Member Ronald Corpuz sa ruta gaya ng Panglao Airport hanggang Tagbilaran City at Panglao Loop na umanoy bukas pa para sa mga aplikante, samantalang nuon umano ay sinabihan silang sarado na ito nang mag-apply sila.
Giit ni De Luna, walang karapatan ang board na magdesisyon kung kanino lang ibibigay ang prangkisa.
Dahil dito, inihirit ng ACTO sa Ombudsman na patawan ng preventive suspension sina Delgra at Corpus.
LTFRB Chair Delgra pinalagan ang akusasyon ng ACTO
Pinalagan ni Land Transportation Franchising and Regulatory Board Chairman Martin Delgra ang kasong isinampa ng grupong Alliance of Concerned Transport Organizations dahil umano sa pagiging bias niya sa pagbibigay ng prangkisa sa ilang kumpaniya.
Ayon kay Delgra, dumadaan sa proseso ang lahat ng aplikante upang mapatunayan na sila ay kwalipikado bago ito desisyunan ng ahensya kung sila ay iisyuhan ng Certificates of Public Convenience (CPC).
Nilinaw din ni Delgra na ang Board of Resolution No. 045 ay hindi binuo para magbigay pabor sa sinuman o anumang grupo.
Ipinabatid ni Delgra na hindi pa sila nakakuha ng kopya ng reklamo ng ACTO kasabay ng pagtitiyak na agad maglalabas ng karagdagan pang komento sakaling mapasakamay na nila ito.
