Pagbobotohan na ngayong araw ng mga mahistrado ng Korte Suprema ang quo warranto petition na inihain ng Office of the Solicitor General o OSG laban kay Chief Justice Maria Lourdes Sereno.
Ganap na alas-10:00 ngayong umaga, pangungunahan muna ni Sereno ang isasagawang en banc session para talakayain ang iba pang mga mahahalagang usapin na kinakailangang pagbotohan ng mga mahistrado.
Una nang tiniyak ng kampo ni Sereno na kusa itong mag-iinhibit sa sandaling mabuksan na sa sesyon ang botohan kaugnay sa petisyong kumukwestyon sa legalidad ng kaniyang pag-upo bilang Chief Justice.
Kahapon, nabalot ng mga kulay pulang laso ang palibot ng Korte Suprema sa Padre Faura sa Maynila, simbulo umano ng mga opisyal at kawani sa hudiktura na nananawagan sa pagbibitiw ni Sereno sa puwesto.
Ayon sa Supreme Court Employees Association, hindi sila kailanman matitinag at inaasahan nilang mananaig din ang katotohanan sa gagawing pagpapasya ng mga mahistrado.
Pero sa panig naman ng kampo ni Sereno, sinabi ni Atty. Carlo Cruz na makabubuting huwag pangunahan ang magiging pasya ng mga mahistrado at makabubuting hintayin na lamang ito.
—-
