Binatikos ni Senador JV Ejercito ang pagkaka-absuwelto ng itinuturong mastermind sa operasyon ng illegal drugs na sina Kerwin Espinosa at Peter Lim.
Ayon kay Ejercito tila nakakalitong mensahe ito para sa publiko dahil malinaw naman aniya sa mga isinigawang mga pagdinig sa Senado na mismong si Espinosa ang umaming sangkot ito sa iligal na droga noon pang 2005.
Inalala rin ni Ejercito na maging ang pagbibigay umano ng malaking halaga ng pera sa ilang mga opisyal ng gobyerno at mga alagad ng batas ay inamin din ni Kerwin.
Giit ng senador, dapat ipakita ng pamahalaan na seryoso ito na maparusahan ang mga sangkot sa iligal na droga malaking personalidad man ang mga ito o maliliit.
CJ Sereno impeachment
Samantala, inamin din ni Senador JV Ejercito na hindi ito interesado sa impeachment hearing laban kay Chief Justice Maria Lourdes Sereno.
Ipinaliwanag ng senador na mas maraming bagay pa sana ang mas dapat tutukan para sa ikagaganda ng pamumuhay ng mga Pilipino.
Batay sa obserbasyon ni Ejercito, halos wala rin aniyang pakialam ang publiko sa impeachment complaint na kinakaharap ng Punong Mahistrado.
By Ralph Obina
