Umaasa ang Malacañang na mapapanagot na sa lalong madaling panahon ang lahat ng mga may pananagutan sa sangkaterbang mga problemang kinahaharap ng Metro Rail Transit Line 3 (MRT-3).
Ito’y ayon kay Presidential Spokesman Harry Roque ay makaraang personal na dumulog sa Palasyo ang mga umano’y testigo na may hawak ng ebidensya laban sa lahat ng mga dating opisyal ng pamahalaang nagpasasa rito.
Ayon kay Roque, ibinunyag sa kanila ng grupo ng mga whitsleblower ang pamamayagpag ng ‘Pangasinan Group’ na aniya’y naghati-hati umano sa mga kinita ng MRT na nasa bilyong piso ang halaga.
Mahigit kalahating milyong piso umano ang kinita ng Pangasinan Group o 1/3 ng kabuuang kita ng MRT, 1/3 naman anila rito ang ginamit sa pangangampaniya habang 1/3 na lamang ng kabuuang kita nito ang napunta sa pagmamantina sa mga tren.
